Nunavummut timmisartuussisalernissaq ujartorpaa
- Naggueqatitsinnut ilisarisimasaqarlualernissarput attaveqarluarnissarpullu pingaaruteqarpoq. Aamma taamaappoq angallannikkut pisariinnerusumik naggueqatitsinnut angalasinnaanissarput, taamaattumik pisariaqarpoq Naggueqatitsinnut toqqaannarnerusumik angalasinnaanissarput. Inatsisartuni nunanut allanut - sillimaniarnissamullu ataatsimiititaliami ilaasortaq Aleqa Hammond taama oqarpoq.
- Nunavummut angalaniarneq ullumikkut pisariusorujussuuvoq, naak toqqaannartumik angalanikkut akunnerit marluk sinnilaarlugit angalasinnaagaluarluta. Allatut ajornartumik Islandikkooqqaariarlutalu USA-kkoortariaqartarpugut, tassanngaanniillu Torontoliaqqaariarluta Iqalunnukarsinnaalluta. Tamanna pisariuallaaqqaaq, Aleqa Hammond oqarpoq.
Kalaallit Nunaannit Nunavummullu toqqaannartumik angalasinaaneq imminut akilersinnaanngitsutut nalilerlugu 2001-imi unitsinneqarpoq. Ullumikkulli tamanna imminut akilersilersinnaalersimanerluni?
- Taamanikkut pissutsit ullumikkut pissutsinut naleqqiullugit allaanerujussuupput. Illoqarfiit sisamat akornanni arlaata tikinneqartalernissaa, Air Greenlandip sulissutigigaa ilisimavarput. Attaveqalersinnaanissaq pillugu illuatungeriit pisussaaffilerneqassasut, Inatsisartuni kissaatigaarput, taamaaliornikkut aaqqiissuteqartoqarnissaa anguneqarsinnaassammat. Imminut akilersinnaasumik attaveqalernissaq tamatta kissaatigaarput, Aleqa Hammond oqarpoq.
Aleqa Hammond aamma inatsisartuni ilaasortaq Jane Petersen Nunavumeeqqammerput.
Toqqaannartumillu Nunatsinniit Nunavumut angalasinnaanissaq naggueqatitsinnik ataatsimeeqateqarnerminni soqutigineqarluarsimasoq Jane Petersenip oqaatigaa.
- Oqaluttuarisaanerput oqaatsitigullu assigiissuseqarnerput eqqarsaatigalugu attaveqarnissaq pisariaqartipparput. Taamaattumik suleqatigiinnerup ilisareqatigiinnerullu ujartoqarnera aallaaviulluni silaannakkut angallannerit toqqaannartut Nunatsinnut Nunavummullu pilerinartinneqartut soqutigineqarluartullu paasivarput, Inatsisartunut ilaasortaq Jane Petersen oqarpoq.
