Nunavummiut Uranimik piiaasoqarsinnaaneranut akerliupput

Hudsonip kangerliumarngata kitaani Qamanersuarmi aatsitassamik Uranimik annertuumik piiarneqarsinnaasumik januaarip qaammataani nassaartoqarpoq.
Allattoq Jaaku Lyberth
februaarip 22-at 2009 17:38

Uraneqarfiusumi tuttorpassuit uninngaartarput, uranimillu piiaasoqalerpat tuttut nerisaat mingutsinneqassapput tuttunniartarnerlu unitsinneqartariaqassalluni, taama Canadami Montrealimi ilanngutassiortorput Marianne Stenbæk allappoq.

Qamanersuarmi innutaasut peqatigiiffiat uranimik piaanissamut akerliunertik takutinniarlugu arlaleriarlutik innutaasunik ataatsimiititsipput taamatullu Inuit kattuffiannut Nunavut Tunngavik-mut allaqarput, allagaqarnerminni ersersinniarpaat, pinngortitap mingutsinnginnissaa pingaaruteqarnerpaammat pissutigalugu naggueqatigiit inuit inuuniarnerminni tuttut inuussutigigamikkit.

Uranimik piiaasoqaleraluarpat naggueqatigiit inuit najugarisaat ulorianartorsiortinneqalissaq peqqissusiat ajoquserneqarluni, ukiorpassuarnilu inuussutigisaat tuttunniartarneq ajoquserneqarluni.

Avatangiisit mingutsinneqarsinnaaneranut misissuisseqqissaartoqarsimanngilaq, tamannalu innutaasunit piumasarineqarpoq piianissamut pilersaarut ingerlateqqinneqartinnagu.

Kivalliq Energy Corporation, naggueqatigiit inuit kattuffiat Nunavut Tunngavik suleqatigalugu misissueqqaarnissat ingerlanneqarnissaannik akuersissummik tunineqarput. Nutaarsiassaq suliffeqarfimmut iluaqutaasussatut nuannaarutigineqarpoq, innuttaasunulli Qamanersuarmiittunut tuluttut Baker Lake-imiittunut ernumatitsivoq.