Nunavummiut siunissaat qaamanerusutut isikkoqalersoq
Nunavut sinnerlugu nunamut piginnittussaanermik isumaqatigiissummik isumaginnittup, Nunavut Tunngavik, Canadami naalakkersuisut isumaqatigiissummi neriorsuutigisaminnik eqquutsitsinnginnerarlugit eqqartuussivimmut suliassanngortissimavai.
Naggueqatigiit Inuit ilinniartitaanerat pitsaasuunngilaq, tamannalu pissutigalugu atorfiit qaffasinnerusut ilinniarsimasunik inuttassaaleqissunneqarlutik.
Taamaammat Nunavut Tunngavik naalakkersuisut Nunavummut 1 milliard dollarsinik - tassalu 5 milliardit koruunit missaannik - akileeqqullugit piumasaqaateqarsimavoq.
Upernaaq manna isumaqatigiissusiortoqarpoq, Nunavut 251 millionit dollarsinik, 1,2 milliardit koruunit missaannik, taarsiivigineqarluni.
Nunavut Tunngavimmi vicepresidenti James Eetolook KNR-imut taama oqaluttuarpoq.
Aningaasarpassuillu sunniuteqalereerput. Naggueqatigiinnut Inunnut ilinniartitaanikkut aaqqissuussinerit nutaat suliffinnillu sungiusarnerit aallartisarneqarsimapput, atorfinni amerlanerni pitsaanerusunilu sulilernissaat siunertaralugu.
- Naaperiuteqartariaqarsimagaluarluta aningaasat pissarsiavut Nunavummi isumallualersitsipput, James Eetoklok taama oqarpoq.
- Nunavummiut siunissaat qaamanerulersutut ippoq, James Eetoklok taama naggasiivoq.
