Nunavummiut issittup ukiuani aningaasassaaleqipput
Inuunermi atukkat pillugit misissuinissarsuarmi Nunavut ilaanngitsoorsinnaavoq, aningaasaliissutissat suli inissinneqanngimmata. Taama Nunatsiaq Newsimi allaaserinnittoqarpoq.
Inuppassuit peqataaffigisaannik peqqissutsimik misissuinissaq siunertaralugu umiarsuaq sikusiut Nunavummi avinngarusimasunut angalasussaavoq, ukiorlu manna Issittumut ukiorititaammat Canada-mi oqartussanut aningaasanik qinnuteqartoqarsimavoq.
Qinnuteqaalli akineqanngimmat ilisimatuut misissuiartortussat nalornileqqapput.
- Paasitinneqanngikkutta ukioq manna misissuinissaq angumerisinnaanavianngilarput, ilisimatooq misissueqataasussaq doktor Grace Egeland Nunatsiaq News-imi issuarneqarpoq.
Nunavummi illoqarfiit 20-it tikinneqartussaagaluarput, aningaasaliisoqanngippallu illoqarfiit arfiniliinnaat tikinneqarsinnaassapput. Misissuinermi inuit 12.000-it Nunatsinneersut Canada-meersut, Alaskameersut Ruslandimeersullu peqataanissaat pilersaarutaavoq.
