Nunavummiut "engelsk syge" nappatigilersimavaat

Allattoq Jaaku Lyberth
juunip 12-at 2007 10:35

Meeqqat nappaataat ”Engelsk syge-mik” taaneqartartoq, saanernik qerattanngitsoortitsisartoq, Nunani Killerni atugaavallaanngilaq. Naggueqatittali nunaanni Nunavumi Canadamiittumi namminersornerulerneq eqqunneqarmat ukiut tallimat ingerlareerneranni naggueqatitta akornanni inuit katillugit 31-t taamatut nappaatillit naammattoorneqarsimapput.

Taamatut napparsimalertarneq ukiuunerani seqineq nuissaaraangat seqernup qinnguaanik amigaateqalernikkut, kiisalu nerisat allanngoraluttuinnarneranik, ilaatigut peqquteqartinneqarpoq.

Seqineq ukiuunerani tarrikkaangat, seqernup qinnguaanik amigaateqalernermi timikkut D-vitamiinit amigaatigineqalersarput, vitamiinilu taanna qangarsuaaniilli aalisakkanit, puisit tinguinit, timmissat manniinit, aarrup arferillu neqaannik mattaanillu nerisaqarnermi naggueqatigiit Inuit pisarsimavaat. Qallunarninnerusunik nderisaqalernermi engelsk sygemik taaneqartartumik napparsimasoqaqqajaalernera patsiseqartinneqartarpoq.

Meeqqat aamma sissangasunngortarput, taamaammallu Nunavumi peqqinnissaqarfik suliniuteqarluni aallartippoq.

Pingaartumik arnat naartusut D-vitamiininik iioraasarnissaannik peqquneqartarput. Aamma illoqarfinni akeqanngitsunik D-vitamiininik agguaasoqartalersimavoq.

Nunavumi ”meeqqat nappaataannik” tassa engelsk syge-mik, nappaatillit ukiuni kingullerni tallimani 31-t paasineqarsimagaluartut, ukiuni taakkunani nunatsinni taamatut nappaatilimmik ataasiinnarmik naammattuuisoqarsimavoq. Taama oqarpoq, Dronning Ingridip Napparsimmavissuani, Nuummiittumi nakorsaatitortunut immikkoortortaqarfimmi allaffissornikkut nakorsaaneq, Karin Ladefoged.