Nunavummiut arnartaat iviangikkut kræfteqalersarnerup ilisimatusarfigineqarneranut katersuinialersut
Nunap immikkoortuani Kitikmeot-ni arnat 2012-imi Steps for Hope-mut (Neriunneq pillugu pisuttuaqatigiinnermut) peqataapput, ukiormannalu nunap immikkoortuani Kivalliq-miut arnartaat peqataallutik.
Nunap immikkoortuani Qikiqtani arnat aappaagu pisuttuaqatigiinnissamik maanna pilersaarusiortuupput. Igloolimmit kujammut Hall Beachimut - Sanirajammut - kilometerinik 70-inik pisuttuartoqassaaq.
Suliniut Inuit Tapiriit Kanatamimit tapersersugaavoq, tassanngaanniillu oqaatigineqarpoq aappaagu pisuttuaqatigiinnermi aningaasat katersorneqartut nunap immikkoortuata Albertap iviangikkut kræfteqalersarnerup ilisimatusarfigineqarneranut aningaasaateqarfianut tunniunneqarumaartut.
Pilersaarusiorneq aallartilluareerpoq Nunavummilu arnarpassuit pisuttuaqatigiinnermut peqataaniarlutik nalunaareersimallutik, koruunillu millionip affaanik katersisoqarnissaa neriuutigineqarpoq.