Nunavummiut akiuussutissamik kapoorneqassapput
Nualluummik H1N1-imik aamma puulukit nappataannik taaneqartumik akiuiniarneq aatsaat taama annertutigisoq, Nunavummi novembarip aallaqqaataani aallartinneqassaaq.
Allattoq Mads Lynge
Kikkulluunniit kapitinnissaminnik kissaateqartut H1N1-imut akiuussummik kapineqarsinnaapput, aaqqissuussamillu suliniut ullunik 16-inik sivisussusilik, novembarip aallaqqaataani aallartissasoq, CBC Northip nittartagaani taama allaaserinnittoqarpoq.
Suleqatigiit katillugit tallimat Nunavummi ataatsikkut angalaartinneqassapput nunaqarfinnilu peqqinnissaqarfimmi sulisut suleqatigalugit H1N1-imut akiuussutissamik kapoorissallutik.
Nualluummik H1N1-imik Nunavummi akiuiniarneq katillugu 6,5 millionit koruunit missaannik akeqassaaq.