Nunavummi ullumi qinersisoqassaaq

Qinersinermut pissanganaqisumut 70-it qinigassanngortissimapput, taakkulu ilagaat Nunavummiut maanna siuttorisaat Eva Aariak - taassumalu siuttutut ingerlaqqinnissani kissaatiginagu qinersineq sioqqullugu nalunaareersimavoq.

Qineqqusaarnermi apeqqutit annertuut arfinillit pingaarnerutillugit sammineqarsimapput.

Siullertut, ineqarnikkut atugassarititaasut ajorluinnartut, Nunavummimi naalakkersuisut Nunavummi innuttaasut tamarmik inissiani peqqinnartuni naleqquttunilu najugaqalissappata inissianik 3500-nik sanaartortoqartariaqarnera nalunaarutigisimavaat.

Ajornartorsiut annertooq alla tassaavoq atortulersuutinik amigaateqarnerujussuaq, soorlu assersuutigalugit katersortarfiit, umiarsualiviit aqquserngillu.

Peqqinnissaqarfik aamma kinguaattooqqaffiuvoq. Nunavummi nakorsanik immikkut ilinniagalinnik amigaateqartoqarnerata kingunerisaanik napparsimasut 30.000-it ukiut tamaasa Nunavut avataanut Canadap kujasinnerusortaanut katsorsartikkiartortinneqartariaqartarput.

Qineqqusaarnermi aamma ilinniartitaanerup sulilernissamullu sungiusaasarnerup pitsanngorsarneqarnissaat sammineqarput. Innuttaasummi affaasa missaat suliffissaaleqinertik pissutigalugu suliffeqannginnersiutinik tapiissutinillu allanik pisartagaqartuupput.

Ullumikkut qinersinissaq Nunavut 1999-imi pilersineqarneranit qinersinerit sisamaraat.