Nunavummi sipaarniuteqartoqartariaqassaaq
Nunavummi ukiumi matumani aningaasanut inatsit naapertorlugu, canadamiut aningaasaat 10 millioni dollarit, tassa 50 millioni koruunit missaat, sipaarutigineqassapput.
Nunavummi ministeriunerup, Paul Okaliup, ministerini sipaarfiusinnaasunik ujarleqqusimavai.
- Sipaarniarnerulli kingunerisaanik soraarsitsisoqassanngilaq, Paul Okalik oqarpoq.
Paul Okaliup taama piumasaqarneranut uuliap akitsoriartornera peqqutaavoq, tamannali Nunavummi sulisut kattuffiinit upperineqarpianngilaq.
- Pisortat suliffeqarfiutaani atorfillit 1800-t aningaasarsiaasa isumaqatigiinniutigineqarneri naammassisullu qaammat suli naanngitsoq Paul Okaliup sipaarniaqqusilluni nalunaaruteqarnera kattuffimmi ilaasortat nalaatsornerinnaasorinngilaat, kattuffiup siulittaasua Doug Workman oqarpoq.
Nunavummi kaaviiaartitat 1 procentii, tassa canadamiut aningaasai 10 millioni dollarit, sipaarniutigineqarnialersut, CBC North allappoq.