Nunavummi qinikkat ullumi ataatsimiilissapput

Nunavup 1999-imi pilersinneqarnerata kingorna Inatsisartunut sisamassaa oktobarip 28-anni qinersisoqarpoq, Inatsisartunngortullu ataatsimeeqqaarnissartik pillugu Iqalunnut ullumi tikissallutik. Nunatsiaq News taama allaaserisaqarpoq.
Allattoq Mads Lynge
novembarip 06-at 2013 10:21

Inatsisartunut siulittaasunngortussaq sapaatip akunnerata tulliani toqqarneqarumaarpoq, soorlu aamma Naalakkersuisut siulittaasussaat Naalakkersuisullu allat ilisaritinneqarumaartut.

Naak Qeqertaalunni Kangertugaapimmi Qeqertarsuarmilu, kiisalu Kivallermi Kangerlinermi qinersinermi inernerit pisortatigoortumik suli saqqummiunneqanngikaluartut, Inatsisartut siulittaasussaat Naalakkersuisunngortussallu toqqarneqassapput.

2008-mi qinersisoqarmat inuit pingasut Naalakkersuisut siulittaasussaattut piukkoorput, tassaallutik taamani Naalakkersuisut siulittaasuat Paul okalik, Eva Aariak aamma Tagak Curley. Eva Aariak taamanikkut siulittaasunngorpoq.

Ukioq manna qinersereernerup kingorna arlaqarput, tassaallutik Nunavut Tunngavimmi siornatigut præsidentiusimasoq Paul Quassa, qinersivimmi kingullermi naalakkersuisuusimasoq Peter Taptuna. Naalakkersuisut siulittaasuattut inisseqqikkusunnerluni Paul Okaliup oqaatigerusunngilaa, Inatsisartunulli qinigaaqqammersup oqaatigaa Okalimmit sianerfigineqarsimalluni, Okalik tapersersortissarsiorluni sianersimasoq oqaatigalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq