Nunavummi pisariaqartinneqartut tulleriaarneqarsimanngillat
Nunarsuarmi tamarmi aningaasarsiornikkut ajornartorsiorneq Canada-mi naggueqatitta nunaanni aamma malunniuttoq Canada-mi ilanngutassiortutta Marianne Stenbæk-ip oqaluttuaraa.
Nunarsuarmi tamarmi aningaasarsiornikkut ajornartorsiorneq Canadami malugineqarsinnaavoq. Nunanut allanut sanilliullugu Canadami aningaasarsiornikkut ajornartorsiorneq annertuumik malugineqarsinnaanngikkaluartoq, aningaasarsiornikkut nutaanillu suliffinnik aallartitsinissamik iluaqutaasinnaasunik naalakkersuisut ujartuipput. Aqqusiniornerit nukissiuutinik nalinginnaasumik atorneqarneq ajortunik sanaartornerit illuliornerit umiarsualivinnillu mikinerusunik sanaartornerit aallartinneqarnerisigut aningaasarsiorneq iluaquserniarneqarpoq. Tamakkulu tamarmik Canada-mi Nunavummi pisariaqartinneqarput. Nunavut mi naalakkersuisut siulittaasuata Eva Aariak-p Canada-mi inuiaqatigiinni tamanut iluaqutissanik atortulersuutit pillugit naalakkersuisumik John Baird-imik ataatsimeeqateqarnermini Nunavummi suliniutit nutaat pillugit aningaasaliinissaq oqallisigaat. Nunavummi nunap ilusilersorneqarneranut ilaatigut umiarsualiviliornissamut atugassanik aningaasaliinissaq piaartumik sulissutiginiarlugu John Bairdip neriorsuutigivaa.Nunavummili naalakkersuisut ajornartorsiutigineqarput. Naalakkersuisut nutaajungaaramik suliassat pingaaruteqartut tulleriaarsimanngilaat, sunalu pingaarnerunersoq maannakkut oqaatigisinnaanagu Marianne Stenbæk Canada-miit ilanngutassiornermini ilaatigut taamatut oqarpoq.
Canada-mi tamarmi suliassat pingaaruteqartut tulleriiarneqarnissaat suliniutigineqartoq, Canada-mi ministeriunerup Stephen Harperip tusagassiortunut oqaatigisimavaa. Aningaasanut inatsisissamut nutaamut ilanngunneqartussat januaarip ulluisa 27-anni saqqummiunneqassapput. Nalorninartualli tassaavoq Nunavummiut aningaasanut inatsisimmi nutaami ilanngunneqarsinnaanersut, taamaalillutik aningaasarsiornikkut iluaqusiiniarnermi atuisinnaaniassammata.
