Nunavummi Namminersornerullutik Oqartussat illoqarfimmi Rankin Inlet-imi nutaamik parnaarussiviliortitsilerput.
Taama aalajangertoqarpoq tamatuma nalunaarusiarineqarneraniit ukiut arfinillit qaangiuttullu.
Parnaarussivissaq parnaarussanut 60-inut inissaqartitsissaaq, canadamiullu dollarii naapertorlugit 37 millioni dollarinik naleqassaaq koruuninngorlugu 180 millioni koruunit missaanni naleqassalluni.
Parnaarussivissaq 2011-imi naammassereersimassasoq Nunatsiaq News allaaserinnippoq.
1999-imi tamanna pillugu nalunaarusiortoqaqqaarmat parnaarussivitoqqat ajorluinnarnerat taakkartorneqarpoq, ilaatigut ulikkaarpallaarnerat taakkartorneqarluni.
Nutaamillu parnaarussiviliortoqarnissaanik aalajangertoqarnissaata tungaanut ukiut arfinillit ingerlaqqaartariaqarsimapput.