Inuktitut: Nunavummi oqaatsinik ilinniartitsineq isornartorsiorneqartoq

Nunavut Tunngavimmit nalunaarusiap nutaap Nunavummi ilinniartitaanermut aaqqissuussinermi Inuktitut oqaatsinik ilinniartitsinermut atatillugu amigaateqangaatsiarnerarpaa tamannalu piorsarsimassutsimut toqoraanertut taallugu.

Inuktitut oqaatsit Nunavummi pingaarnertut oqaasiunissaat kissaatigineqarsimagaluarpoq taamaattorli oqaatsini pingaarnerit tulliattut inissisimalersimalluni, Nunavut Tunngavimmi præsidenti Aluki Kotierk nalunaarusiap saqqummiunneqarnerani taama oqarpoq.  

Nutaarsiassaqartitsiviup CBC Newsip allaaserisaa napertorlugu inuiannik toqoraanermik taavaa.

Nunavut Tunngavik suliniaqatigiiffiuvoq, Nunavuup pilersinneqarnerani isumaqatigiissutigineqartut malinneqarnerannik nakkutiginninnissamik akisussaasuusoq. 

Nunavummi Inuktitut oqaatsit uummarissarneqarlutillu siammarterneqarnissaat isumaqatigiissutigineqartunut ilaavoq.

 Aluki Kotierk aamma oqarpoq, Canadami naalakkersuisut Inuktitut oqaatsit pingaarnerunngitsutut inissisimalernissaannik iliuuseqanngikkaluarlutik taamatut inissisimalersut, Inuktitut oqaatsinik ilinniartitsinissamut naalakkersuisut naammattunik aningaasaaliisimanngimmata. 

Ajornartorsiut annertooq alla taassavoq Inukitut oqaatsit siammarterneqarnissaannut uummarissarneqarnissaannullu ilinniartitsisunik naammattunik peqanngimmat, Aluki Kotierk oqarpoq. 

Ilinniartitsisut oqaatsinillu ilinniartitsisinnaasut amerlanerusut Nunavummi sulilernissaannik pilersaarummik, ukiuni qulini atuuttussamik Nunavummi ineriartortitsisoqarpoq.

- Oqaatsinilli Inuktitut atuinissamut atuarfiit kisimik akisussaanngillat. Uagut tamatta ilaquttatsinni ulluinnarnilu inuunermi atorneqarnissaat akisussaaffigaarput, David Joanasie CBC Newsimut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat