Nunavummi naalakkersuisut qullersaqarfiilu qarasaasiaannut unioqqutitsisumik isertoqartarnera ajornartorsiutaangaatsiarpoq. Qarasaasiat ramsomwaremik taaneqartartumik allakkanik atuaasinnaajunnaarsitsisartumik virusilerneqarput, akiliisoqartinnagulu atuarneqarsinnaanatik. Assi: Norse // maps.norsecorp.com

Nunavummi naalakkersuisut qarasaasiatigut saassunneqartut

Nunavummi naalakkersuisut qarasaasiaat unioqqutitsilluni iserfigineqarput, taamaalilluni naalakkersuisut toqqartaataat tamangajammik atuarneqarsinnaajunnaarput.

Nunavummi naalakkersuisut qullersaqarfiilu qarasaasiaannut unioqqutitsisumik isertoqartarnera ajornartorsiutaangaatsiarpoq. Qarasaasiat ramsomwaremik taaneqartartumik allakkanik atuaasinnaajunnaarsitsisartumik virusilerneqarput, akiliisoqartinnagulu atuarneqarsinnaanatik. Nunavuup nalunaaqutaa naapertorlugu arfininngornermi ullaakkut qarasaasiatigut saassussisoqarpoq.

Naalakkersuisuni sulisut ilaasa iserfissaq ussassaarulluunniit e-mailikkut tallimanngornermi unnukkut nassiunneqarsimasoq ammarmassuk virus aaneqarsimasinnaavoq.

Nunavummi naalakkersuisut siulittaasuata, Joe Savikataap ajornartorsiutaasoq unissaanngitsumik aaqqiissuteqarfiginiarlugu Nunavut Newsimut oqaatigaa. Qarasaasiatigullu toqqortaatinut backuppit atorlugit allagaatit pissarsiareqqinniarneqaleruttornerarlugit.

AAMMA ATUARUK Tele-Postip qarasaasiatigut isumannaallisaaneq annertusaaviginiaraa

Tamatuma saniatigut allagaatit inunnut tunngasunik soorlu peqqinnissamut aamma ilaqutariinnermut, inatsisinut aningaasanullu tunngasunik paasissutissartallit pissarsiarineqaqqinnissaat naalakkersuisunit pingaarnerutinneqartut oqaatigaa.

Nunavummi illoqarfinni inuiaqatigiinnut ministerip, Lorna Kusugap inunnut paasissutissat naalakkersuisut aarlerinartorsiunngissorigaat, CBC Newsimut erseqqissaatigaa.

Allagaatit atuarneqarsinnaaleqqinnissaannut akiliisoqaqqaassasoq qarasaasiatigullu iliuuseqarniartoqaraluarpat paasissutissat tamarmik annaaneqarsinnaasut qarasaasiatigut saassussisut qarasaasiaq atorlugu nalunaaruteqarput.

AAMMA ATUARUK Nunarput internetti atorlugu kilitsissiaqarnermit aarlerinartorsiortoq

Iqalunni naalakkersuisut qarasaasiatigut saassunneqarnerisa saniatigut Nunavummi inuiaqatigiit 25-t aamma eqqugaapput.

Attaveqatigiinnerup aaqqiiviginiarneqarnera sapaatip akunneranik ataatsimik minnerpaamik sivisussuseqassasoq Nunavummilu naalakkersuisuni emailit qarasaasiamullu tunngasut allat tamarmik atorsinnaanngitsut oqarasuaatillu kisimik atorneqarsinnaasut naalakkersuisut ilisimatitsissutigaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat