Nunavummi mattusimanissamut aningaasarpassuit atorneqartut
Nunavummi naalakkersuisut innuttaasut Ottawami akunnittarfimmi mattusimatinneqarnissaannut aningaasanik millionilikkaanik atuisimapput. CBC News nittartakkamini taama allaaserisaqarpoq.
Nunavummi naalakkersuisut innuttaasut 1200-t sinnerlugit Nunavummut utinnginnerminni Ottawami matttusimatinneqarnissaannut 5 millionit dollarinik, imaluunniit 23,6 millionit koruunit missaannik, maannamut atuisimappput.
Mattusimaneq
Nunavut, Canadami nunap immikkoortuini kisiartaalluni coronavirusimik nassaarfiusimanngilaq, Nunavummullu angalaniaraanni angallannermut malittarisassat sukannersorujussuupput.
Innuttaasut Nunavummut utileraangamik ulluni 14-ini mattusimatinneqarsimanermik takussutissamik Nunavummi peqqinnissaqarfimmut uppernarsaaqqaartariaqartarput.
Nunavummi naalakkersuisut tassunga atatillugu innuttaasut illoqarfinni sisamani, tassa Ottawami, Edmontonimi, Winnipegimi Yellowknifemilu mattusimatinneqarnissaannut aningaasartuutinik matussusiisarsimapput.
Yellowknifemili illu atorneqartoq matuneqareerpoq.
AAMMA ATUARUK Nunavut: Meeqqat angerlarsimaneranni filmi ilinniarfigissavaat
Nunavummi naalakkersuisut innuttaasut mattusimatinneqarnissaannut katillugit 21 millionit dollarinik, tassa 100 millionit koruuningajannik maannamut atuisimapput.