Nunavummi inuussutissat akii pillugit akerliussutsimik takutitsisoqaqqittoq
Immuk liiterit marluk 75 koruuninik akeqarput, nangillu poortat ataaseq 200 koruuninik akeqarlutik.
Canadami naalakkersuisut immikkut ittumik aaqqiissuteqarsimagaluarput taaguutilimmik Nutrition North, tassa akit qaffasinnerujussuisa appartinneqarnissaannik aaqqissuussineq.
Akit appartinneqarnissaannik tapiissutit niuertarfinnut taamaallaat tuttarsimapput pisinianullu iluaqutaasimanatik.
Ippassigami Iqalunni akerliussutsimik takutitsinermi Canadami naggueqatigiit Inuit kattuffianni siulittaasoq Terry Audla peqataavoq.
Canadami naalakkersuisut annerusumik iliuuseqarnissaat pisariaqartoq, Terry Audlap erseqqissaatigaa, tassami naggueqatigiit Inuit nerisannaavi soorlu aqissit tuttullu akitsorsimammata.
Inuit ikittuinnaat qamuteralannut, aallaasinut imassanullu piniarnermi pisariaqartinneqartunut akissaqarput.
Issittumi siunnersuisoqatigiit siulittaasuat Leona Aglukkaq Eqalunni akerliussutsimik takutitsoqarnerata nalaani Eqalunniippoq, akerliussutsimilli takutitsisunut ilaanngilaq, taassuma oqaatigaa kingullermik 2000-imi akerliussutsimik takutitsisunut peqataalluni, maannali naalakkersuisut suleqatigalugit ajornartorsiutip aaqqinneqarnissaanut suleqataalluni.
