Nunavummi innuttaasut atugaat ajorluinnarput

Nalunaarusiaq nutaaq suliaritissimasartik, Nunavummi naalakkersuisut isummerfigisussanngorpaat. Nalunaarusiaq "Qanukkanniq?"-mik taaneqartoq, Nunavummi pissakilliortoqarneranik, kaattoqarneranik, nappaalasoqarneranik, pitsaanngitsunik atuarfeqarneranik, inuttut ajornartorsiuteqartoqarneranik inissaaleqisoqarneranillu ersersitsivoq.

Nunavut ukiut qulit matuma siornatigut pilersinneqarpoq, naggueqatigiinnullu Inunnut pitsanngorsaaterpassuarnik kinguneqarumaartoq assut naatsorsuutigineqarsimagaluarluni.

Nunavummili inuit pissakilliortorujussuupput, meeqqallu affaanik amerlanerusut kaallutik innartartut, ukiut qulit qaanngiunneranni paasinarsisimavoq. Ikiuinissamik pilersaarutit nutaat, pingaartumik meeqqanut tunngasut, aallartinneqarnissaat nalunaarusiap innersuussutigai. Meeqqat inuusuttullu amerlavallaartut atuarnerminnik naammassinnittanngimmata, taamaalillutillu suliffeqalertarnatillu pissakilliortutut inissisimaannartarmata, atuarfimmi ilinniartitaanerup pitsaanerulersinnissaa aamma sulissutigineqartariaqarpoq. Inissiatigut atugassarititaasut ajorput, pissusissamisoortumillu ineqartoqassappat, inissiat nutaat 4.000-it missaanniittut atorfissaqartinneqarput. Peqqiilliortoqarpoq tarnikkullu napparsimasunut ikiuisinnaasunik peqartoqanngilaq. Pissutsit pitsaanngitsut ingerlateqqinneqartartut amerlapput, nalunaarusiami allassimavoq.

Nunavummi pissutsit nukillalaarnarnerat nalunaarusiap "Qanukkanniq"-rup ersersippaa. Taamaammat nalunaarusiap innersuussutaasa piviusunngortinnissaannut ajornartorsiuterpassuillu iliuuseqarfiginissaannut Nunavummi naalakkersuisut Canadap naalakkersuisuinut aningaasanik amerlanerusunik atugassinneqarnissamik qinnuteqarnissaq toqqartariaqalersinnaavaat, tamatumali peqatigisaanik Nunavut annertunerusumik nammineersinnaatitaanissamik kissaateqarpoq.

Nunavummi naalakkersuisut siulittaasuata Eva Aariaap oqarneratuut: Nalunaarusiaq nutaartaqanngilaq, ajornartorsiutit ilisimaaraavut ingerlariaqqinnissarlu ajornaatsuinnaassanngilaq.

Canadami ilanngutassiortutta Marianne Stenbækip ilanngutassiaa Hanseeraq Jonathansenimit kalaallisuunngortinneqarpoq.