Nunavummi imigassamik ikiaroornartumillu atornerluisorpassuit

Imigassamik aanngajaarniutinillu ajornartorsiuteqarneq inuiaqatigiinnut akisusaqaaq – ilumullu taamaattoq canadamiut maanna paasivaat. Nunavummullu tamanna nuanniippoq. Tassami Nunavut tassaavoq, imigassamik aanngajaarniutinillu ajornartorsiuteqarfiunerpaaq, ajornartorsiutillillu taakku katsorsartissinnaanatillu arlaatigut ikiorserneqarsinnaannginnerat, inuiaqatigiinnut akisusaqaaq.

Aviisi Nunatsiaq News taama allappoq.

Atornerluisunut ikiorserneqanngitsunut Nunavummi innuttaasut tamarmik immikkut agguaqatigiissillugu canadamiut dollariinik 2184-nik ukiumut aningaasartuuteqartarput, tassa 11.600 koruuninik. Aningaasartuutaanerpaappulli nakorsamit suliaritinneq, atornerluinermut tunngatillugu politiinut suliakkiutaasartut, taavalu atornerluisut suliffimminnik nakkutiginnissinnaannginnerat pissutigalugu aningaasat maangaannartartut.

Aningaasartuutit katinnerat Nunavummi innuttaasut amerlassusaannut taava agguarneqartarpoq.

Nunavummi politiit suliaat atornerluinermut arlaatigut attuumassutillit akisoorujussuupput – perulluliornerit politiinut kalerriutigineqartut 75 procentit 80 procentillu akornanniittut atornerluinermut tunngasuusarput, Nunavummi politiit naliliipput.

Peqqinnissaqarfik aamma artukkerneqartaqaaq, atornerluisut eqqarsaatigalugit, Nunavummi napparsimmaveqarfik Canadami aningaasartuuteqarnerpaalluni.