Nunavummi ilisimatusarfittaarnissaq pilersaarutigineqarpoq
![](/sites/default/files/styles/image_934x467/public/article_images/arktis_-_foto__inuitcircumpolar.com_12.jpg?itok=9veBgmt9)
Inuit Iqalunni The Ilitturvik University Society-meersut ilisimatusarfittaassamik pilersaarusiortuupput. Marianne Stenbæk Montrealimiit taama tusarliussaqarpoq.
Pissutsit maanna atuuttut pissutigalugit ilisimatuut Nunavummi najugallit Canadap kujasissortaaneersuunerusarput, ilisimatusarnissamullu aningaasaliissutit ilisimatusarfinnut kujasinnerusumiittunut tunniunneqakkajupput.
Canadap issittortaani ilisimatusarfeqalernissap pingaaruteqassusaa, Canadap generalguvernøriata Michaelle Jeanip qangalili oqaatigereerpaa, Nunavummiunillu tapersersorneqarpoq.
Ilisimatusarfittaassamik aqutsisuusussat marluk Kirt Ejesiak aamma Aaju Peter Nuummeeqqammerput, inuttut pisinnaatitaaffiit pillugit ilisimatusarfik ICC-p aqutaa kiisalu Ilisimatusarfik ataatsimeeqatigigamikku. Annertunerusumik suleqatigiissinnaanissaq matumani neriuutigineqarpoq.
Silap pissusaata annertunerusumik misissuiffigineqarnissaa, pinngortitallu inuiaqatigiillu naggueqatigiit Inunnit annertunerusumik ilisimatusarfigineqarnissaat neriuutigineqarpoq, Nunavullu siunissaa eqqarsaatigalugu sukumiinerusumik oqallittoqarnissaa neriuutigineqarluni.
Nunavummi ilisimatusarfiliorniarneq Ilisimatusarfimmi rektorip Tina Parsip nuannaraa:
- Pilersaarutit aatsaat aallarnisarneqaleruttorput. Ilisimatusarfilli ukiuni 25-ni misilittagaqarfiuvoq, Nunavullu Kalaallillu Nunaat amerlasoorpassuartigut assigiissuseqarput, misilittakkavullu tunuliaqutaralugit tunniussaqarsinnaavugut, Nunavummilu ilisimatusarfiup piviusunngornissaa neriuutigaara, Tina Pars Radioaviisimut oqarpoq.