Nunavummi arnat persuttagaasartut amerlanerupput

Canadami nunap immikkoortui tamaasa isigigaanni, Nunavummi arnat persuttagaasartut amerlanerpaapput. Iqalunni borgmesteri Elisapee Sheutiapik, tamatumunnga iliuuseqarniarsaraaq. Taassuma Iqalunni aqqusernup arnat ornittagaata inissisimaffiata 'inngilit aqqusernat"-nik ateqalernissaa isumagisimavaa.

Borgmesteri radioaviisimut oqarpoq, taamatut iliuuseqarnikkut ajornartorsiutip ajunngitsup tungaanit isigaluni, maluginiarneqarnissaa iliuuseqarfiginissaalu pineqartut. Tamatuma peqatigisaanik arnanut persuttarneqarnermikkut toqutaasimasunut tamanna eqqaassutaassaaq. Tassami oqaaseq inngili isumaqarsinnaavoq, toqoreersimasut inuillu inoqatiminnik ikiuiniarsarisut, Elisapee Sheutiapik oqarpoq.

Elisapee Sheutiapik aqqusinermik 'inngilit aqqusernanik' taasaminik suliniuteqarluni ukiut pingasut matuma siornagulli aallartippoq, ilanngullugulu oqaatigalugu Canada tamakkerlugu aqqusinernik taamaattunik pilersitsisoqartariaqartoq. Taamaattumik Canadami illoqarfippassuit allaffigisimavai, 'inngilit aqqusernat'-nik pilersitsinissaannik kajumissaarlugit.

Canadami illoqarfiit allat sisamat maannamut aqqusinermik 'inngilit aqqusernat'-nik atsiisimapput. Illoqarfiit taamatut atsiiniartut ilagaat Yellowknife, tassani aqqusineq sorleq 'inngilit aqqusernat'-nik atserneqassanersoq qaammammi matumani aalajangiiffigissavaat.

Taamatut atsiinissaq rockimik erinarsortartup Lucie Idlout-ip ernarsugaannit isumassarsiaavoq, taassumami ikinngutini arnaq angutaamminit toqutaasoq erinarsuutigimmagu.