Nunavummi arfivittassatik marlunngortikkusuppaat

Iqalunni sapaatip akunnerani kingullermi tusarniaasoqarmat tamanna paasinarsivoq, Nunavummi pinngortitaq pillugu oqartussaasut – Nunavut Wildlife Management Board - NWMB-mik naalisarneqartartoq - naggueqatigiit Inuit piniartut kissaataannik oqaluttuunneqarmat, piniartullu kissaataat Canadami Ottawami Aalisarnermut Immamillu atuinermut ministerimut maanna ingerlateqqinneqarput.

Nunavummiut arfivimmik ataatsimik pisaqarsinnaatitaapput, taannalu Nunavuup qiterpasinnerusuani Kuugarummi aasaru pisarineqassasoq aalajangiunneqareerpoq. Sulili ataatsimik pisassiisoqaqqissappat, taanna Nunavummi allami pisarineqassagaluarpoq, tassami piniartut allat aamma nuannaarutissaminnik pisaqassagaluarmata.

Iqalunni tusarniaanermi Canadami immap uumasuinik ilisimasallit misissuinerminni paasisaminnik paasissutissiipput, taakkualu oqaatigaat nungusaataanngitsumik arfiviit ukiumut 18-it pisarineqarsinnaasut.

Nunavummi piniartut Canadami Aalisarnermut Immamillu atuinermut ministeeriaqarfimmit ullut 60-it qaangiutsinnagit akissutisissapput.