Nunavummi aningaasaqarnikkut ineriartortitsivittaalerput

Siorna nunap issittortaani aningaasaqarnikkut qitiusoqarfimmik Canadian Northern Economic Development Agencymik taaneqartartup pilersinneqartariaqarnera pillugu oqallittoqaqaaq, taamaalilluni suliassatut pilersaarutit nutaat aningaasarsiornerullu patajaallisarneqarnissaa aallartinneqarniassammata.

Aningaasarsiornikkut pilersaarutini isumassarsiat ilusissallu nunap kujataaniit eqqunneqartartut sivisuaallaamik atorneqartarput, maannali tassa taakkua avannaatungaanut illuartinneqarlutik. Qitiusoqarfik nutaaq CanNorimik taaguuteqartussaq Iqalunnilu pilersinneqassaaq, taamaattorli illoqarfinni pingaarnersatut illoqarfinni marlunni Yellowknifemi Nordvestterritoriamiittumi Whitehorsemilu Yukonimiittumi immikkoortortatut allaffeqassalluni.

CanNor ukiumut ukiunilu tulliuttuni tallimani ukiut tamaasa 50 mio. kr.-inik aningaasaliiffigineqartassaaq katillugit 250 mio. kr.-inik. Nunavumi parlamentimut ilaasortap Leona Aglukkap ministeriuneq peqatigalugu tamanna nalunaarutigaa. Taanna oqarpoq aningaasaqarnikkut ineriartortitsiviup taassuma Iqalunniinnissaa pissuteqartoq innuttaasut siunissaat naalakkersuisut tamakkiisumik aalajangersimasumillu sulissutiginiarmassuk. Nalunngilarput nunat allat issittortavut qiviallaagaat suleqatigiinnermikkut periarfissat sumi tamaaniittut aningaasarsiornikkullu periarfissat anguniarlugit, taamaattumik nunap issittup nammineq inui Canadallu namminersortuunera patajaallisarniarpavut, ministeriuneq Harper oqarpoq. Canadap ilaani ilaatigut nunap immikkoortuini Atlantikumut sineriaqartuni ineriartortitsivinnik taamaattunik peqareerpoq, taakkualu iluatsissimaqalutik.