Nunavummi aligoqqerujussuarmik nassaartut
Nunavummi aligoqqinnik piiaavik siulleq, Jericho, pisortatigoortumik juulip aallaqqaataani ammarpoq, piiaavimmiillu aligoqqerujussuarmik nassaartoqartoq nalunaarutigineqarpoq.
Suliffeqarfissuarmi,Tahera Diamond Corporationimi, oqaaseqartartoq, Grant Ewing, CBC-mut oqaluttuarpoq, piiaaviup pisortatigoortumik ammanngitsiarnerani, juunip qaammataani, aligoqqinnik piiaasut aligoqqik pitsassuaq nassaarisimagaat. Aligoqqik nassaarineqartoq centimeterit pingajuat affaq takissuseqarlunilu silissuseqarpoq – immeraatitut angitigaluni 59 karatitullu akuitsigaluni.
Aligoqqik 400.000 canadamiut dollariinik, tassa 2 million koruunit missaanni, Grant Ewingip naleqassangatippaa.
Aaligoqqinnik piiaavik, Jericho, Inuiviaaluit eqqaani Nunavup kippasinnerusortaaniippoq.
Naggammillu nassaartoqarsimassanngitsoq Grant Ewing isumaqarpoq:
- Aligoqqiit allat pitsaasut nassaarereerpavut. Aligoqqiillu pitsaalluinnartut maaninassaarineqarsinnaasut maanna uppernarsaatissaqartilereerlutigu. Oqarsinnaalluarpugullu taakku imminnut akilersinnaalluartuusut, Grant Ewing CBC-mut oqarpoq.
