Nunavummi aatsitassarsiorfik ukioq kaajallallugu savimminissamik assartuisarniartoq

Qeqertaalummi saviminissamik piiaavimmik piginnittoq ingerlatsisorlu, Baffinland Iron Mines, nutaamik siunnersuuteqaqqammerpoq. Siunnersuutaalu innuttaasunit akerlilersorneqanngitsoornavianngilaq.  
 
Baffinland Iron Minesimmi qimuttuitsut atorlugit saviminissamik assartuisarnissaa pilersaarutaaqqaaraluarpoq. Piiaavimmit Qeqertaalutigoorluni Steensby Inletimi umiarsualivimmut kujallermut. Tassanngaanniillu Hudsonip Kangerliumarngatigut Kalaallit Nunaat avaqqullugu Europamut assartorneqartussaagaluarluni.

Pilersaarullu taanna akuersissutigineqaraluarpoq. Qimuttuitsulli aqqutissaat akisuallaassasoq sanaartorneqarnissaalu sivisuallaassasoq kingorna paasineqarpoq.
 
Tamanna paasineqarmat saviminissaq annikitsukkuutaarlugu Milne Inlet aqqutigalugu umiarsuarmik assartorneqartassaaq, aasakkuinnarlu tamanna ingerlanniarneqarluni.
 
Pilersaarummi nutaami, sapaatip-akunnerata siuliani saqqummiunneqartumi, saviminissaq Milne Inletimit umiarsuarmik assartorniarneqartoq pingasoriaatinngortinniarneqarpoq. Tamannalu aasakkuinnaq pinnani ukiup qaammataani qulini pisarnissaa pilersaarutaalluni.
 
Umiarsuit sikusiortarnissaannik tamanna isumaqarpoq. Qeqertaaluup avannaata kangiani Milne Inletimit, Mitsimatalik avaqqullugu, Baffinip kangerliumarngatigut Ikkannersuaq Davisikkut kujammut ingerlaartassapput.
 
Mitsimatalimmi piniartut ilaat, Caleb Sanguya, tupassimaqaluni ima oqarpoq:
 
- Umiarsuit sikusiorlutik assartuisarnissaannik siunnersuutip amerlanerussuteqartunit itigartinneqarnissaa nalunngilara, Caleb Sanguya CBC newsimut oqarpoq.
 
Baffinland Iron Minesilli umiarsuarnik 2017-imi ukiukkut assartuinissani naatsorsuutigaa.