Nunavumi tusilartoq neriuutissaqarpoq

Ippassaq radioaviisimi oqaluttuaraarput Nunavumi angut tusilartoq pinerluuteqarsimanini pillugit eqqaartuussaasinnaanngitsoq, inunnut allanut attaveqartariaasia eqqartuussivimmi atorneqarsinnaanngimmat. Angutilli eqqartuussaanissaa immaqa periarfissaqalerpoq, Nunavumi nutaarsiassaqartitsivik Nunatsiaq News ullumi tusarliussivoq.

Angutimmi eqqartuussaasinnaannginnera saqqummiunneqartorlu Canadami nunat inuiisa ussersorlutik attaveqartarnerat assut oqallissutigineqalerpoq. Oqillinnermilu Canadami nunap inuuisa ukiuni hundredelikkaani ussersorlutik attaveqatigiittarneranik nutserisussatut ilinniartitaasarnissaq ilaatigut qaqinneqarpoq.

Ussersorluni attaveqartarnermut nutserisoqaleraluarpat Nunavumi innuttaasut tusilartut pinerluttuugunik pinerluttuunngikkaluarunilluunniit eqqartuussivimmi nutserisoqalissangaluarput.

Nunatsiaq News allappoq Nunavumi tusilartut ullumikkut 155-iusut, taakkulu affangajaat inuit ussersortariaasiannik atuisuusut.

Nunavumi tusilartut oqalussinnaanngitsullu amerikamiut ussersortariaasiannik ilinniariartinneqartarput, tamannali siunissami immaqa allanngussasoq Nunatsiaq News allaaserinnippoq.