Nunavumi Qilalugartassat

Akilinermi naggueqatitsinnut qilalugartassiissutigineqartartut maanna oqillisigineqaleruttorput. Canadami aalisarnermut pisortaqarfiup naggueqatitsinnut ukiuni tallimani tulliuttuni qilalugartassiissutissat amerlassusissaat aalajangiiffiginiartussanngorpaa. Qilalugartassallu ikileriaannaapput.

Nunavumi nunap immikkoortuini tallimani ukiuni tallimani kingullerni qilalugartassat amerlassusiat aalajangersorneqanngillat, taamaattorli pisat piniartut peqatigiiffiannut nalunaarutigineqartarnissaat piumasaqaataalluni. Piniartullu peqatigiiffiata pisanik nalunaarsukkat Canadami aalisarnermut pisortaqarfimmut nalunaarutigisarpai.

Qilalugartanilli nalunaarsuineq ingerlalluarpallaarsimanngilaq, tamannalu pillugu aalisarnermut pisortaqarfimmit pisassat immikkut amerlassusilerniarneqalerput, malittarisassat malinneqarnissaat anguniarlugu.

Nunavumi qilalukkat arfinillit ukioq manna pisarineqarsimasut nalunaarutigineqarpoq, amerlanerusunilli pisaqartoqarsimanissaa pisortaqarfimmit ilimagineqarpoq.

Nunavumi ukioq manna 27- inik qilalugartoqarsimanissaa Pisortaqarfiup eqqoriarpaa. Ukiuni tallimani kingullerni qilalukkat pisat ukiumut 38-it missaanniittarsimapput.

Kisitsisilli taakku pisassiinissamut atussallugit tutsuiginanngippallaartutut nalilerneqarput, tamatumalu saniatigut Aalisarnermut pisortaqarfik isumaqarpoq manna tikillugu nalunaarsuineq atorsinnaanngitsoq, malittarisassat malinneqanngitsutut immata.

Nunavumi qilalugarniarneq pillugu qanittukkut ataatsimiinnermi piniartut 100-it oqallinnermi peqataapput, ataatsimiinnermilu oqartussat erseqqissaapput, nalunaarsuinermi malittarisassat malinneqanngiinnassappata, tamanna qilalugartassat ikilisinneqarnerannik kinguneqariaannaasoq.