Nunavumi pisassat ikilinialerpaat
Nannuttarisinnaasat pillugit Nunavut-mi oqartussaasut isumartik allanngorteriataarpaat. Amerliniarneqartut siullermik tusarliunneqarpoq, maannali tassa pisassat ikilinialerpaat.
Nunavut-mi piniartut nanorpassuarnik takunnissimanerat tunngavigalugu, nannullu taama amerlatigisut innuttaasunut ulorianarsinnaammata, ilisimatuut mianersoqqusinerat soqutiginagu nannuttasat Nunavut-mi oqartussaasut ukioq-manna januaarimi amerlivaat.
- Nannut amerlavallaalersimappata innuttaasunut tamanna ulorianarpoq. Meeqqanik silami pinnguartoqartuaannarpoq, mianersornissarpullu pisariaqarpoq, Nunavut-mi Avatangiisinut taamanikkut ministeriusoq, Olaayuk Agisuk, oqarpoq.
Maannali tassa allatut nipilimmik tutsiuttoqarpoq. Nannut ikiliartornerannik ilisimatuut oqalunnerat
ajugaavorlusooq. Nunavut-mimi nannuttassat ikilisinniarneqalerput, sumiiffinnilugooq arlalinni allaat nannuttassat affaannaat pisarineqarsinnaalissapput.
Ilisimatuut naapertussagaanni tamatumunnga pissutaanerpaavoq nannuttassat nunatta Canadallu avittarmatigik, ilisimatuullu oqaatigaat, nunatta avannaani amerlavallaartunik nannuttoqartartoq. Taamaattumillu Canadami politikerit kaammattorneqarput, Nunatsinni nannunniartarnerup alaatsinaanneqarnissaa Namminersornerullutik Oqartussanut piumasaqaatigissagaat.
Nunarpulli kisimi pisuutinneqarsinnaanngilaq. Hudson-ip Kangerliumarngata kippasinnerusortaani nannut arfinileriaammik ikileriarsimanerannut nunarsuatsinni silaannaap allanngoriartormera aamma pissutaaqataavoq.
Nannuttassalli Nunavut-mit ikilineqannginneranni ilisimatuut ajornakusooqisumik suliassaqalerunarput. Tassami piniartunut tusarniartariaqassavaat sooq nannuttassat amerlineqassanersut isumaqarnersut.
Ilisimatuullu namminneq inernerit pigisatik piniartunut ilutigalugu aamma nassuiartariaqassavaat.
Ilisimatuut piniartullu ilisimasaat nalinginnaasut imminnut assortuupput, tamannalu isumaqatigiinngissuteqarnermik kinguneqarsinnaavoq.
Nunatsinni nannuttassat ikilisinneqassanersut suli ilisimaneqanngilaq. Aalisarnermut Piniarnermullu naalakkersuisumut Rasmus Frederiksen-imut Radioaviisimiit tamanna qanittukkut apeqqutigigatsigu oqaaseqarfigiumanngilaa, Sverigimili avisimut ullormut saqqummersartumut ulloq taannarpiaq oqarsimavoq nannunniartarnermut malittarisassat januaarimiit sukannernerulissasut.