Nunavumi passit ajornartorsiutaapput
Naggueqaterpassuagut Canada-p issittortaani najugaqartut nunatsinni ikinngutiminnut ilaquttaminnulluunniit tikeraarniarnerat ajornakusoornerulissaqisoq Canadamiut nutaarsiassaqartitsiviat CBC allappoq.
Ajornartorsiut tassaavoq kinaanermik uppernarsaatit sukannerneroqisumik malittarisassiuuneqarsimanerat, tamannalu sillimaniarnerulernissamik pissuteqarpoq. Assersutigalugu kinaanermut uppernarsaatip assitassaa immikkorluinnaq suliarineqartalissalluni, tamannalu pillugu Nunavumi atortorissaaruteqarsimanngillat.
Nunavumi inatsisartut ippassaq ataatsimiineranni erserpoq, pingaartumik utoqqaanerusut eqqarsaatigalugit kinaanermik uppernarsaammik pisaarniarnissaq ajornarnerulissaqisoq. Tamannalu pissutaalluni angalanissat kulturikkullu paarlaaseqatigiitarnissat taamaatiinartariaqarsinnaallutik.
Nunavumi naalakkersuisoqarfimmiit kinaanermik uppernarsaatit assitassaanik misiliilluni suliaqartoqarsimagaluarpoq, pitsaasusaallu ajorineqarlutik atorneqassanngitsut Canadamiut oqartussaasui aalajangersimapput.