Nunavumi nakorsassaaleqipput

Nunavup immikkoortuini marlunni napparsimmavittaat nutaat marluk sulisussarsiuleruttorput, napparsimmavittaanilu taakkunani nakorsat peqqissaanermillu ilinniagaqarsimasut allat katillugit 130-it atorfissaqartinneqartut, Nunatsiaq News allaaserinnippoq.

Canadami aviisimi peqqinnissamik sammisaqartumi The Medical Post-imi Nunavumi nakorsanik atorfissaqartitsineq sammineqarpoq, tassanilu Nunavup peqqinnissaqarfiani sulinissap ingammik kajuminnannginnera ersersinniarneqarsimalluni.

-Nunavumi peqqinnissaqarfik amigaatinik, kukkunernik, sulinermut atatillugu inissanik pakatsinartunillu allanik ulikkaarpoq, The Medical Post ilaatigut taama allaaserinnppoq. Tamatumalu saniatigut Nunavumi nakorsassaaleqiffioreeqisumi nakorsaasut ikittuinnaat suleruluttariaqarnerat aamma ilannguneqarsimavoq, Canadap immikkoortui tamat eqqarsaatigalugit Nunavut aamma nakorsiarfiunerpaajusoq ilisimaneqarmat.

Nunatsiaq News tamanna pillugu allaaserinnippoq ajornartorsiut Nunavumi naalakkersuisunit aaqqiiffiginiarneqartoq, ilaatigut tusagassiuutit aqqutigalugit sulisussat kajumilersinniarneqarlutik.

Nunavumi nakorsat aningaasarsiarissaarluartuupput, ukiumut 1,4 mio. kronet pallillugit aningaasarsiaqartinneqarlutik.