Nunavumi naggueqativut ilungersorput
Akitsinni Nunavumi nunaqqataasut franskisut oqaasillit inatsisit tunngavigalugit atugarissaarnerulersinneqarnissartik neriuutigaat
”Ukiuni kingullerni arfineq marlunni Nunavumi namminersulerneqaleraluarmat franskisut oqaaseqartugut missukutaasutut misigisimajuarpugut” Nunavumi franskisut oqaasillit siuttuat Daniel Cuerrier CBCmut oqaluttuarpoq.
Akunnerup naanerani Nunavumi eqqartuussiviit qullersaataa franskisut oqaasillit naammagittaalliutaat ilalerlugu, qitiusumi aqutsisut Ottawamiittut qinnuigaat franskisut oqaasillit sullinneqarnerisa pitsanngorsaavigineqarnissaat.
Pingaarnertut tikkuarneqarpoq napparsimaveqarnermi franskisut oqaasilinnut atugassarititaasut naleqqutinnginneri. Pitsanngorsaaniartoqanngippat inatsisit tunngaviusut naapertorlugit franskisut oqaasillit iliuuseqarniarput.
Nunavumi oqaatsit pillugit oqartussaatitap Johnny Kusugap franskisut oqaasillit ajornartorsiutaat paasisinnaaneraraluarlugit, erseqqissarpaa inuktitut oqaasillit aammattaaq oqaatsimik pisortatigoortumik amigartumik atuisinneqarnerat ajornartorsiutigigitsik, Canadamilu naalakkersuisut paasitikkusullugit Nunavut ilitsoqqussaralugu oqaasilinnit amerlanerpaanit najorneqarnera – tassalu naggueqatitta oqaasiinik atuiffiusumi
Nunavumi oqaatsit assigiinngitsut pingasut oqaaserineqarnerat.
Nunavumi naggueqatitta oqaatsiminnik pisortatigoortumik atuisinnaanerminnut, franskisut oqaasillit namminneq oqaatsiminnik pisortatigoortumittaaq atuisinnaannerminnik ilungersuuteqarnerat naggueqatitta iluaqutigiinnarsinnaavaat, CBC nalunaarpoq.
