Nunavumi kajumissaasiipput

Nunavumi nunap inuiisa oqaasii nunatsinnisuulli sammineqartarput.

Inuktitut oqaatsit tammatsaaliorniarlugit Nunavumi Namminersornerullutik Oqartussat ukiut tamaasa kajumissaasiisarput.

Arnaq utoqqasaaq Baker Lakemi najugalik ukiuni arlalinni Nunavumi inuit oqaasiisa atuinnarneqarnissaanik suliniuteqarsimasoq, Winnie Owingayak, ukioq manna kajumissaaserneqassaaq.

Baker Lakemi utoqqasaat radiumut sianerlutik inuunerminni misigisimasaminnik inuktitut oqaluttuarnissaannik Winnie Owingayak kajumissaarisarpoq, inuktitut oqaatsinik ataasiakkaanik katersinissamik kajumissaarisarluni kiisalu erinarsuutitoqqat oqaluttuatoqqallu qanoq oqariartuuteqarnerinik oqallittoqarnissaanik aamma kajumissaarisarpoq.

- Winnie Owingayakip sulinermini inuusuttut utoqqasaallu isumassarsitittarpai oqaatsittalu tammatsaaliorneqarneranut pingaaruteqarluinnartuuvoq, Nunavumi naalakkersuisut siulittaasuat, Paul Okalik, Baker Lakemi najugalimmik kajumissaasiinermi taama tunngavilersuivoq.