Nunavumi inatsisartut aamma ataatsimiipput
februaarip 22-at 2006 07:20
Inatsisartut Kalaallit Nunaanni ulluni makkunani kisimik ataatsimiinngillat, Nunavumi inatsisartut aamma ataatsimiipput.
Ataatsimiinnermi aporaattoqangaatsiarnissaa ilimagineqartoq, CBC-imit nalunaarutigineqarpoq.
Ataatsimiissutissat saniatigut ministerimik nutaamik toqqaasoqassaaq. Angallannermut ministeri, Peter Kilabuk, qanittukkut tunuarpoq, taassumalu taartissaanik toqqaasoqartussaavoq.
Kikkut ministerinngussanersut Nunavumi inatsisartut toqqartarpaat, ministeriunerullu ministereqarfiit toqqagaasimasunut agguaattarpaat.
Nunavumi aningaasaqarnermut nutaamik inatsisiliortoqassaaq, imigassaq pillugu aamma inatsisiliortoqassalluni.