Nunavumi arnat ikiornialerpaat
Nunavumi ukiorpassuarni oqallisigineqarneq ajortoq, tassa arnanut persuttaasarneq ammasumik oqallisigerusunneqalersoq, Canadami nutaarsiassaqartitsivik 940 NEWS allaaserinnippoq.
Tamatuma oqallisaalernissaa Nunavumi inunnik siunnersuisartut atorfilittallu aallartippaat, ilaatigut Nunavumi inuit 100-t peqataaffigisaannik ataatsimoorluni isumasioqatigiinneq aqqutigalugu, (tassa seminareqarneq aqqutigalugu), arnat uiminnit persuttarneqartarnerat pingaarnerutillugu oqallinneqarpoq.
Nunavumi Namminersornerullutik Oqartussamit isumasioqatigiinnermi misilittagaalersut siunnersuutigineqartullu arnat persuttarneqartarnerannut tunngatillugu nutaamik aaqqissuussinissamut atorniarneqarput.
- Arnanut persuttaaneq isertuukkunnaarlugu pisortatigoortumik oqaatigineqarsinnaalertariaqarpoq, Nunavumi naalakkersuisut siulittaasuat Paul Okalik ammaanersiornermi oqaaseqarnermini taama ilaatigut oqarpoq.
Angutit arnanut persuttaasartut angerlarsimaffimminniit anisinneqarsinnaalernissaat iseqqusaajunnaarnissaallu pillugu maanna Nunavumi Inatsiseqarnermut ministereqarfik inatsisissamik siunnersuusiorpoq.
Tamatuma saniatigut, qimarnguiit arlallit pilersinniarneqarput, Nunavumi inissaaleqineqarnera tunngavigalugu arnat persuttarneqarsimasut qimarnguissaqartarsimanngimmata.
