Nunavumi akit assigiissinniarneqalerput

Akit assigiigunnaarnissaat pimoorullugu oqallisigileruttoripput akitsinni Nunavumi innaallagissiorfissuaq Nunavut Power Corporation siunnersuuteqarpoq aappaagumiit innaallagissap akii assigiilissasut, Nunatsiaq Newsip Internetikkut nittartagaani atuarneqarsinnaavoq. Tasamani akit assigiilissappata Nunavumi illoqarfinni annerusuni suliffiit innaalligissamik atuinermikkut annerusumik akiliuteqartalersut, illoqarfinni minnerusuni akiliinikinnerulissapput.

Siunnersuutigineqartoq akuerineqarpat naatsorsuutigineqarpoq suliffeqarfiit kilowattimut akunnermut 2 kr. 41 øre-ertalissasut, inuinnaallu 2 kr. 55-øreqartalissallutik.

Nunavumi innaallagissamut akit kommunini 25-usuni assigiinngiiaaqaat, tamarmik immikkut akigititaqarlutik. Taamatut ingerlaatsimi 1997-imili atorneqalersumi suliffeqarfiutillit akikinnerusumik innaallagissamut akiliuteqartinneqartarput, Canadami naalagaaffiup kukkunersiuisua Sheila Fraser nalunaaruteqarpoq, tamatumalu kinguneraa millionilikkaanik ajunaaruteqartarneq, allannguilernermut peqqutaaqataasussaq.