Nunaviup namminersulernissaa isumaqatigiinniutigineqalersoq

Nunaviup namminersulernissaanut isumaqatigiissut, Makivik Corporationip præsidentiata Charlie Wattip, naggueqatigiillu Inuit siuttuata Mary Simonip, Canadap naalakkersuisuisalu sapaatip-akunnerata massuma ingerlanerani atsiorpaat.
Canadap nunap inoqqaavinut tunngasunut ministeriata Carolyn Bennettip, isumaqatigiissut Canadap oqaluuttuarisaaneranut pingaarutilik naalakkersuisut sinnerlugit atsiorpaa. Makivik Corporation, Nunavimmi naggueqatigiit sinnerlugit atsiortuuvoq.

Nunaviup namminersulernisssaa pillugu Nunaviup Canadamilu naalakkersuisut isumaqatiginninniarsinnaanissaat pisortatigoortumik aallartissinnaanngorput.

Nunavimmi naggueqatigiit Inuit naalakkersuisoqatigiiliorsinnaanissamut  pisinnaatitaaffeqarnerisa sinaakkusiorneqartut, Charlie Wattip atsioqatigiinnermi oqaatigaa, inatsisit tunngaviusussat, pingaartitat, kinaassutsimut tunngasut, kulturi oqaatsillu matumani pingaartinneqarlutik, Watt oqarpoq, nangillunilu:

- Nunatsinni eqqissilluta inuulersinnaagutta ineriartorlutalu, taava siornatigut naapertuilluanngitsuliorsimanerit akuerineqarlutillu aaqqiivigineqarsinnaalissapput. Piffissanngorpoq, Charlie Watt oqarpoq.

Mary Simonip isumaqatiginninniarnerit aquttuuffigivai, taassuma KNR-imut oqaatigaa isumaqatiginninniarnissat aallartinnissaannut erinisulluni, oqaluuserisassammi amerlaqaat, ilaqutariillu atugarissaarnerulernissaat pingaarnertut oqaluuserineqassapput, soorlu aamma Nunavimmi innuttaasut isumaginninnikkut sullinneqarnerat, peqqinnissaqarfiullu pitsanngorsarneqarnissaa pingaartinneqartoq.

Nunaviup namminersulernissaanut atatillugu isumaqatigiissutip atsiorneqarnissaa Makivik Corporationip piareersarpaa, Nunavimmi innuttaasunik ukiut kingulliit marluk ingerlaneranni ataatsimiititseqattaarluni.