Kalaaleq ilisimatusartoq ilisimatoorlu, Minik Rosing, ilisimatuut akornanni tupaallaataasumik, ilisimatusarnikkut paasisaminik allamik maanna saqqummiussisinnaalerpoq.
Ilisimatuut nunani tamaneersut peqatigalugit Minik Rosingip paasisimavaa, nunarsuup nunavittaasa pinngoriartornerat maanna aalajangiunneqartumiit siusinnerujussuakkut pisimassasoq. Tamanna ukiut 3,8 milliardit matuma siornagut pisimassaaq, tassa siusinnerusukkut aalajangiunneqartumiit, ukiunik 1,3 milliardinik siusinnerusukkut.
Paasisaq nutaaq tamanna USA-mi ullumikkut saqqummiunneqassaaq, ilisimatuut atuagassiaani Science-mi, paasisanilu taakkunani tunngavigineqarput Minik Rosingip suleqataasalu, Isuani, Nuummiit 150 kilometerinik avannarpasinnerusup kangiani, qaqqap innermik anitsisartup anngaani paasisat. Suleqatigiit ilaatigut Norge-meersuupput, Afrika Kujallermeersuullutik, Canadameersuullutillu.
Isuaniipput nunarsuatsinni qaqqat sananeqaataat pisoqaanerpaat, anngat ilaat immap naqqani innermik anitsisoqarneratigut pinngorsimasut.
Ilisimatooq Minik Rosing, Københavnimi Geologisk Museumimi atorfeqartoq, uumassusillit tappiorannartut nunarsuatsinniittut aalajangiunneqaqqaartunit pisoqaanerunerat saqqummiukkamiuk, nunani tamalaani siusinnerusukkut maluginiarneqarluarsimavoq.
