Nunavimmiut naaggaarput
Nunavimmiut sapaatip-akunnerini arlalinni akerlioreersullu naaggaarneq pivoq.
Naalakkersuinerup nutarterneqarnissaanut akerliuneq internetikkut aallartimisaarneqarpoq, Facebookimili, Nunavimmi naalakkersuisunut saaffiginninnerusumi, ilaasortat 1.000-it missaanniittut nutarterinissamut akerliunerat erseqqissiartuinnarsimavoq.
Isumaqatigiissut akuerineqarsimagaluarpat, Nunavimmi naalakkersuineq nutarterneqarsimassagaluarpoq, allaffissornikkullu suliat annerit pingasut kattunneqarsimassagaluarlutik, isumaqatigiissummulli angertut taamaallaat 1.400-pput. Siunnersuut akuerineqassappat angertut 1971-iusussaagaluarput.
Siunnersuut itigartinneqartoq Canadami naalakkersuisut Ottawami angerlarsimaffeqartut peqatigalugit ukiuni qulingiluani suliarineqarsimavoq. Nunavimmi illoqarfiit nunaqarfiillu 14-it qasseeriarujussuarlutik tusarniaavigineqartarsimapput, suliarli tassa maanna aallaqqaataaniit aallartittariaqarpoq.
Taasisitsinerup inernera pissutigalugu Nunavimmi politikki aamma marloqiusanngorpoq. Naaggaartut, tassa Inuit Tapiriit Kanadami præsidenti, Mary Simon aamma senatori, Charlie Watt, marluullutik Makivimmi præsidentiusimapput, illuatungaatigulli, angertut ilaatigut tassaapput, Makivimmi maanna præsidentiusoq, Pita Aatami, isumaqatigiinniarnerni pingaaruteqarsimaqisoq, isumaqatigiinniaqataasullu Minnie Grey aamma Harry Tulugak'.
Nunavimmi inuusuttut politikkimik soqutiginninnerulersimasut taasisitsinerup inernerani aamma malunnarpoq, inunnik taasisitsinerup internetsikkut pernaammik malinnaavigineqarsinnaanera tassani immaqa pissutaalluni.
