Nunavimmiut inuusuttaannut Montrealimi ilisimatusarfeqalissasoq
Nunavummili ilinniarfissat Nunavimmiunit ilinniarfigissallugit ornigineqarpallaanngilaq, Nunavimmi namminneerlutik nunagisaminni ilinniagaqarusunnerugamik.
Nunavimmi kattuffiit sisamat, taakkunani Makivik aamma Avataq Kultur Institut Montrealimi collegeliornissamut assingusumik suleqatigiissuteqarniarput.
Collegessaq Nunavik Sivunitsavut-mmik tassa Nunaviup siunissaanik taaguuteqartinneqassasoq, Makivik Magazinemi aaqqissuisoq, Teevi Mackay KNR-mut oqarpoq, tamannalu pilersinneqarpat ilinnialersussat Inuit oqaluttuassartaat pillugit aammalu oqaatsit, politikki naalakkersuisoqarnikkullu kulturiminnut attuumassuteqartunik pikkorissartinneqarlutik ilinniartinneqarsinnaalissapput.
Nunavimmiut kinaassusaasa ataatsimoortumillu oqaluttuarisaanerisa anguniarneqarnissaat matumani siunertaavoq.
Taamatuttaaq Montrealimi nutaamik collegeqalerpat, ilinniartut illoqarfissuarmi milliuunilikkaani innuttaqartumi inuuneq inuuniarnerlu pillugit ilinniartinneqartalissapput.
Ilinniartullu siunissami suliffeqalersinnaanissaannut ikiorserniarlugit naammassisaqarsinnaassutsimikkut sungiusartinneqartalissapput.
Tassa tunngaviusumik Inuit kulturiat pillugu ilinniartinneqatalissapput.
Nunavimmi Nunavik Sivunitsavut-mi inuusuttunut ilinniarfissaq septembarimi ammarneqassamaarpoq.
