Nunavimmiit Québecimut aqqusinniornissaq qineqqusaarutigaa
Præsidentissatut piukkoortut arlaqarput, qinigassanngortittulli pingaarnerit tassaassagunarput maanna præsidentiusoq Pita Aatami, senatorilu Charlie Watts. Charlie Watts Makivik Corporationimi siornatigut præsidentiunikuuvoq.
Nunavimmiit Québecip tungaanut aqqusinniortoqarnissaa Pita Aatamip qineqqusaarutigaa. Nunaviliarneq ullumikkut akisoorujussuuvoq, timmisartumik qulimiguulimmilluunnit angalasoqartarmat. Billetsi 10.000 koruunit sinnerlugit akeqarsinnaasarpoq. Tamanna pissutigalugu Nunavimmiut amerlanersaasa nunanut allanut angalasinnaanerat killeqarpoq.
Nunavimmiit Québecimut aqqusinniortoqassappat ajunngitsortaqarlunilu ajortortaqarsinnaasoq, Pita Aatamip qineqqusaarutaani atuarneqarsinnaavoq. Nunat immikkoortuisa taakku marluk akornanni assigiinnginnerujussuit nalimmassaavigineqarsinnaanissaat Aatamip ilimagaa.
Aqqusinniornissaq misissuilluarnikkut aatsaat piviusunngorsinnaavoq, Pita Aatamillu neriorsuutigaa Nunavimmi illoqarfiit nunaqarfiillu sukumiinerusumik tusarniaavigineqarumaartut.
