Nunavimmi tuttut ulorianartorsiorput
Tuttut George Riverit, Nunavimmi Kangersualussuup ilaani, Nunatsiavummut killeqarfimmut qanittumi, uumasuupput, taamaammat Nunavimmi Nunatsiavummilu angalaartarlutik.
Tuttut annaanniarlugit iliuuseqartoqartariaqartoq, Nunatsiavummi naalakkersuisut maanna aalajangerput.
Avatangiisinut ministeri, Darryl Shiwak, Labradorimi Radioqarfimmit apersorneqarluni oqarpoq, tuttunniarneq unitsinneqartariaqartoq naalakkersuiut sapaatip-akunnerani uani aalajangeraat.
Taamaallaalli piniartut naggueqatigiinnut Inunnut atanngitsut kisiisa Nunatsiavummi naalakkersuisut piniaqqujunnaarsinnaavaat. Kisianni, Darryl Shiwak oqarpoq, naggueqatigiit Inuit, tamaanilu nunap inuii allat, tassa Innu indianerit, Cree aamma Metis indianerit, qinnuigigilersaarpavut ukiuni tulliuttuni marlunni tuttunniaqqunagit, George Riverinik tuttunniaqqunagit, tuttut kinguaassiorniassammata.
Tuttut nunap ilaanni Quebecip Labradorillu killeqarfiini uumasuummata, nunap ilaani taakkunani naalakkersuisut tuttut pillugit tuaviornerpaamik pilersaarusioqqullugit Nunatsiavummi naalakkersuisut qinnuigaat, tuttut ikileqqinnginnissaat anguniarlugu.
Naggueqatigiit Inuit, Innu- Cree aamma Metis indianerit, kiisalu naalakkersuiut assigiinngitsut sinniisaat Nunatsiavummi naalakkersuisut Nunavimmi Kuussuarmut januaari qiteqquppat ataatsimiigiaqquvaat, tuttunniarnerup unitsinneqarnissaa qanoq aaqqissuunneqassanersoq tassani eqqartorneqassammat.
