Nunavimmi tuberkulosemik misissuineq naammassineqarpoq

Nunavimmi tuberkulosemik misissuinerujussuaq novembarimi aallartinneqartoq maanna naammassineqarpoq.
decembarip 30-at 2015 13:30
Nutserisoq Erna Lynge

Nunavimmi peqqinissamut sullissiviup tuberkulose Nunavimmi qanoq siuaruarsimatiginersoq paasiniarlugu misissuineq aallartissimavaa.

Nunavimmi nunaqarfiit avannarlersaanni Salluit-ni nunaqafiup innuttaanit 1250-isunit sapaatit akunnerini tallimani kingullerni inuit 700-it misissorneqarsimapput.

Nunavimmi peqqinnissaqarfimmi pisortaaneq Dr Serge Dery oqaluttuarpoq misissuinerup kingunerisimangaa tunillatsissimasut nutaat pingasut nassaarineqarneri, taamaallillunilu Salluit-ni maanna tuberkulosertut 30-ngorsimasut paasineqarsimasoq.

Aamma atuaruk Doris: WHO-p TB-mut akiuinitsinnik ikiussavaatigut

Dr Dery oqarpoq tamatuma saniatigut naggueqatitta akornanni takussaanngitsumik tuberkulosertut 31-it paasineqarsimasut. Tamanna tunillatsissimasumut namminermut ilaqutaanullumi tunillatsissinnaasunut navianartorsiortitsisinnaavoq. Taamaattumik tamanna ilungersunartuusoq Dr Dery oqarpoq.

Salluit borgmesteriat Paulusie Saviadjuk tusagassiuutinut nalunaaruteqarpoq oqarluni misissuineq naammassereeraluartoq, Salluimmiut sinneri aamma misissorneqarniassammata nalliuttut qaangiuppata missuinerit aallarteqqinneqarumaartut.

Misissuinerit tamarmik naammassineqarpata Nunaviup peqqinnissaqarfiata tuberkulosertorpassuit unitsinniarlugit paasititsiniaaneq nutaaq aallartissagaa, Canadami ilanngutassiortorput Marianne Stenbæk nalunaarpoq.

Aamma atuaruk Nunavut inuuniapiloornermit suli sunnersimaneqartoq