Nunavimmi pujortarnermut malittarisaat sukannernerulerput

Canadami naggueqatitta nunaanni Nunavimmi pujortartarnermut maleruagassat sukannernerulersinneqarput, Nunatsiaq News allaaserinnippoq.

Nunavimmi neriniartarfinni imerniartarfinnilu ukiortaamiilli pujortaqqusiunnaartoqarpoq, pujortarnermut akiuiniarluni malerugassat massakkut suli sukannernerulersinneqarmata, neriniartarfiit imerniartarfiillu saniatigut, inuit kateriffiini soorlu timersortarfinni, napparsimmavinni, peqqinnissamut sullivinni, atuarfinni, unnuisarfinni sulinermullu atatillugu biilerisani pujortarneq inerteqqutaalerpoq.

Nunavimmiut inunnik meeqqanillu sullissisut pujortartartullu suliffigisartik minnerpaamik 9 meterinik qimallugu silami pujortartalissapput, unnuisarfinnilu init affaat sinnerlugit pujortarfiujunnaarput.

Nunavimmi neriniartarfiit pujortaqqusinnginnermut maleruagassanik unioqqutitsisut canadamiut dollarii 10.000-it angullugit akiligassinneqartassapput, inuillu ataasiakkaat pujortaqqusiffiunngitsuni unioqqutitsillutik pujortartut canadamiut dollarii 600-it angullugit akiligasinneqartalissallutik, Nunatsiaq News taama allaaserisaqarpoq.