Nunavimmi Paggivittamilu Kangersualussuarmi tuttut ikiliartuinnartut
Kangersualussuarmi tuttut 1980-ikkunni 1990-ikkunilu amerlatseruttormata 800.000-it missaanniipput. Tuttut pineqartut Nunavimmiunut Paggivittamiunullu pingaaruteqartuaannarsimapput.
Canadalli immikkoortuata Newfoundland-Labradorip, tassa Paggivittap, pisortatigoortumik sapaatip-akunnerata massuma aallartisimalaarnerani maanna nalunaarutigaa tamaani tuttunniarneq ingerlaannartumik unitsinneqassasoq, tuttut nunguissinnaanissaat aarleqqutigineqarmat.
Tuttut tamaani 2013-imi piniaqqusaajunnaarput, peqqussullu taanna naggueqatigiit Inunnit metisiniillu malinneqarpoq, indianerilli Innu peqqussummik malinnaanatik.
Innulli tuttunniartarnerat tuttut ikiliartupiloornerannut kisimi pissutaanngilaq. Silap pissusiata allanngoriartornera, uumasut kiisortut, piniariaatsillu pitsaanerit qamuteralaallu atorlugit aamma piniartarnerit matumani pissutaaqataapput.
Kangersualussuarmi tuttut 800.000-it missaanniissimariarlutik maanna 8000-it missaannaanniilersimapput, tassa 99 procentinik ikilisimallutik.
Tuttut piniarneqaannassappata ukiut tulliuttut tallimat iluanni nunguissinnaanissaat aarleqqutigineqarsinnaasoq, Newfound-Labradorip avatangiisinut ministeriata Perry Trimperip CBC Newsimut oqaatigaa.
