Nunavimmi nutaamik katsorsaaveqalissaaq

Nunavimmi naatsorsueqqissaarnermi inernerit saqqummiunneqartut nuannerpallaanngillat. Imigassamimmi atornerluinermik Nunavimmi toqquteqartut, Quebecip sinneranut naleqqiullugu pingasoriaammik amerlanerupput, Nunavimmilu inuusuttut pinerluuteqarsimasut Quebecip sinneranut naleqqiullugu sisamariaammik amerlanerupput.

Canadamiunullu allanut sanilliullugu inuusuttut 14-init 22-inut ukiullit akornanni imminnut toquttartut aqqanileriaammik amerlanerunerat ajornerpaagunarpoq.

AAMMA ATUARUK Imminut toquttarnerup pinaveersaartinniarnera Nunavimmi sammineqartoq

Taakkunannga amerlanerpaat imigassamik peqquteqarsorineqartarput, imigassamillu atornerluisuunermut katsorsartingaatsiartoqarnissaa pisariaqarluni.

Isuarsivimmi katsorsaavik ukiuni 20-ni Kuujjuarmi sullissereerpoq, tassani peqataasinnaasut katsorsaanermi ataatsimi qulingiluakkaaginnarput. Taamaammat katsorsaaviup pisortaata, Dave Forrestip Kuujjuarmi borgmesteri Tunu Napartuk suleqatigalugu Ottawami aningaasassarsiungaatsiarnermik aallartitsivoq.

Katsorsaavimmik inunnut 22-nut inissaqartitsisumik pilersitsiniartoqarpoq.

AAMMA ATUARUK Sundhedsundersøgelse i Nunavik er nu afsluttet

Taanna akisussaaq, Kuujjuarmilu katsorsaaviliornissaq 150 millionit koruunit missaannik akeqassalluni. Dave Forrestillu KNR-ip nutaarsiassaqartitsivianut oqarnera naapertorlugu aningaasarpassuupput, iliuuseqannginnerli parnaarussivimmi, napparsimmavinni, nakuusernermi, inuillu nalaataanut atatillugu tarnikkut napparsimalernerannut ukiut tamarluinnaasa sullissisut sulinerat marloriaammik akisunerulluni.

AAMMA ATUARUK Nunavimmi inissaaleqineq ingasalluinnartoq

Pilersitsiniartut suliffeqarfissuit niuertarfiillu, Nunavimmi sulisut katsorsaavimmut taperseeqqunissaat pilersaarutigaat, oqaatigineqartartutullu Nunavimmi aningaasaliinerup pitsaanerpaartaa nunavimmiuniippoq.

Katersineranni maannamut 30 millionit koruunit isertinneqareerput, katsorsaavittaamillu pilersitsinissamut iluatsitsinissartik qularutiginngilaat.