Nunavimmi nunaqarfiit marluk sinneqartoorutinik pissarsipput
Nunaqarfinni marluusuni Salluinni Kangiqsujuarmilu Mike Welchip, aatsitassarsioqatigiiffimmut Xstratamut pisortamut tulliusup aningaasat allagartaat 80 millionit koruuninik nalilik Pita Aatamimut, Makivik Corporationimi præsidentimut tunniummagu nuannaarutigineqaqaaq. Tamanna nalliuttorsiulaarnermi pivoq.
Raglanimi nunaqarfiit Salluit aamma Kangiqsujuap eqqaaniittuni aatsitassarsiorfimmit nikkelimik piiaaffiusumit sinneqartoorutit 80 millionit koruuniusut Makivimmut tunniunneqarput. Aatsitassarsioqatigiiffik tamaani nunap ilaani pingasunik nikkelimik piiaaffeqarput, sisamassaallu sananeqalerluni.
Xstrata Makivillu isumaqatigiissummik 1995-imi atsioqatigiipput, tunisassiornerlu 1997-imi aallartinneqarluni tamatumalu kingorna 525 millionit koruunit sinneqartut iluanaarutit ilaannit Makivimmut tunniunneqarsimapput.
Tamatuma saniatigut attaveqaatit, tassani talittarfik mittarfillu aatsitassarsiorfimmiit piorsarneqarput sananeqarlutillu taamaalillutillu sumiiffimmi suliffissanik nutaanik pilersitsillutik.
Mike Welch, Xstratamut pisortap tullia nalliuttorsiualaarnermi ilaatigut ima oqarpoq:
- Suliffeqarfiuterput nunaqarfinnik eqqatsinniittunik imminut nappassinnassunik ineriartortitsinissamut imminut pisussaaffilersimavoq maanilu nunaqarfinnik ineriartortitsinissamut periarfissiinissaminik kissaateqarluni. Aatsitassarsiornerit tamanut iluaqutaasinnaassusiat Makivimmik isumaqatigiissuteqarsimanitsinnut takussutissaavoq.
Piita Aatamip, Makivimmi præsidentiusup oqaatigaa, nunap immkkoortortaata Quebecip pilersaarusiaa Plan Nord, nunap immikkoortuanut tamanut atuuttussaq Nunaviup siunissaanut aatsitassarsiornermi pingaarutilittut inissisimalersimasoq.
- Siunissami aatsitassarsiorneq pingaaruteqalerattuinnassaaq, Xstratamillu suleqateqarnitta ineriartornermi akuunerulernissatsinnik ikiorsissavaatigut, Piita Aatami oqarpoq.
