Nunavimmi namminersulernissaq ajornartorsiutigaat

Quebec-ip Avannaaniittut naggueqatigiit Inuit Kuujjuarmi ataatsimeersuartitsipput, taallugu Katimajiit. Ataatsimeersuarnermi tassani Nunavimmi inuunermut tunngasut tamarmik eqqartorneqarnissaat siunertaavoq aamma namminersulernissaq pillugu isumaqatigiissutip nutaap atsiorneqarnissaa pisussaagaluarpoq. Namminersulernissaq nunallu immikkoortuani naalakkersuisut tamaani pilersinneqarpata nuna taaguuteqalissaaq Nunavik, tassaallunilu nuna Quebecip Avannaani allorniusat sanimukartut 55-iannit avannarpasinnerusoq.

Kisianni isumaqatigiissutissap atsiorneqarnissaa marlunnik patsiseqartumik kinguartikkallarneqarpoq: Indianerit Naskapi-nik taaneqartartut Nunaviup kujasinnerpaartaani nunaqartut naammagittaalliorsimapput oqarlutik naggueqatigiinnit Inunnit aqunneqarusunnginnertik nalunaarutigalugu.

Indianerit Naskapit 900-nik amerlassuseqartut Canadami nuna tamakkerlugu naalakkersuisunut aamma nunap immikkoortuani naalakkersuisunut piumasaraat, isumaqatigiissut atsiorneqartinnagu naggueqatigiit Inuit naalakkersuisortaavinit namminneq soqutigisamik sumiginnarneqannginnissaannik neriorsuisoqassasoq.

Indianerit oqaaseqartitaat tusagassiorfinnut oqarpoq indianerit Naskapit aalajangikkanut tamanut pisinnaatitaaffimminnik inooriaatsiminnillu tunngassuteqartunut tamanut naaggaarsinnaatitaanissartik. Tamanna angutserlugu isumaqatigiissutissaq akerliuniarfiginiarpaat.

Isumaqatigiissutip atsiorneqarnissaata kinguartinneqarneranut pissutaasut aappaat tassaavoq, sapaatip akunnerani kingullermi Canadami nuna tamakkerlugu naalakkersuisut Chuck Strahl Canadap Avannaanut ministerissatut toqqarsimammasuk, taamaattumillu naalakkersuisut ministerillu nutaap isumaqatigiissutissaq piareersinnaasimanngimmassuk.

Taamaattorli ajornartorsiuteqaraluartoq naatsorsuutigineqarpoq isumaqatigiissut sapaatip akunneri arlaqanngitsut qaangiuppata atsiorneqarumaartoq.