Nunavimmi juumuunngorniartarneq nalliuttorsiutigineqartoq
Ilinniarneq taanna Ungava Tulattavik Health Centremit Nunavimmi peqqissutsimik sullissivik suleqatigalugu ingerlanneqarpoq.
Maannamut ilinniartoq ataaseq juumuutut ilinniakkaminik naammassinnippoq. Peqqissutsimilli sullissiviup oqaatigaa, ernisarfimmik nutaamik pilersitsisoqarpat ilinniartut amerlanerulernissaat neriuutigineqartoq.
Juumuutut nutaamik ilinniartoqartalerneratigut naggueqatigiit Inuit arnartaasa nunaqarfimminni ernisinnaalernissaat siunertarineqarpoq, naartusut taamaalillutik Kuujjuarmut imaluunniit allaat Montrealimut erniartortarunnaarniassammata.
Ilinniarnermik taama aaqqissuussinikkut iluaqutaasussaq alla tassaavoq, arnat naartusut siunissami allamiut oqaasii atornagit juumuumik Inuktitut oqaloqateqarsinnaalernissaat.
Ilinniartitaanermi tamatumani ilinniartut nunap kujataani University of Trois-Riviéres-imi juumuutut ilinniarsimasutulli juumuutut allagartartaartinneqassapput.
Nunavimmi juumuut katillugit sisamaapput, takkaunanili oqaatigineqareersutut ilinniarsimasoq ataasiinnaalluni.
Canadami nunap immikkoortuini Nunavik juumuunik atuisut ikittuinnaat ilagaat. Nunap immikkoortuini allani avannarpasinnerusuniittuni naartusut erningajaleraangata illoqarfinnut annerusunut ernitikkiartortinneqartarput.