Nunavimmi inuusuttut pinerlunniartarnerat annikillisarniarneqarpoq
Inuusuttut ishockey-rtinneqarnerannik aqutsisussaq imaannaanngitsorsuuvoq, tassa USA-mi Canadamilu ishockey-rtartoqatigiinni NHL-imi ishockey-rtartuusimasoq Joe Juneau aqutsisuussagami. Taanna ukiut 13-it ingerlanerini ishockey-rtarnermini millionerpassuassuarnik aningaasarsiorsimavoq.
Joe Juneau silaannarsualiartarnernut tunngatillugu ilisimatuujuvoq, maannali tassa inuusuttunik ishockey-rtitsisartussanngorluni:
- Ilinniagaqarsimanissap pingaaruteqassusia inuusuttut ilikkartariaqarpaat. Asuli maaniinngilagut, anguniagaqarlutali maaniilluta, timersornerlu aqqutigalugu tamanna pisinnaavoq, Joe Juneau oqarpoq.
Nunavik-mi inuusuttut ishockey-rtinneqartalernissaat 6 millioni koruunit missaannik naleqassasoq ilimagineqarpoq.