Nunavimmi inuit taasitinneqarnissaat qallivoq
Nunaviup namminerisaminik Naalakkersuisoqalernissaa pillugu Nunavimmi inuit sinnerlugit Canadap naalakkersuisuinut aamma nunap immikkoortuani Quebec-imi naalakkersuisunut isumaqatigiinniartunut siuttuusut Minnie Grey aamma Harry Tulugak suliaminnik naammassinneqqajaalerput.
Namminerisamik Naalakkersuisoqalerneq Namminersulernertut taaneqarsinnaanngilaq kisiannili tassunga alloriarnerulluni angisooq, Nunavimmullu oqartussaaffippassuarnik tigusinermik kinguneqartussaq.
Nunavimmi illoqarfiit nunaqarfiillu tamakkerlutik aqagu aallartittumik naggataamik tikeraarneqartassapput, qaammatip ataatsip ingerlanerani paasisitsiniaavigineqassallutik, Minnie Grey aamma Harry Tulugak Radioaviisimut oqarput.
Nunaqarfinni aqutsisut aamma illoqarfiit borgmesterii siulliullugit ataatsimeeqatigineqartassapput. Tamatuma kingorna Namminerisamik Naalakkersuisoqalernerup siunertaa radiokkut paasisitsiniaassutigineqartassaaq, aatsaallu taamaaliortoqareeraangat innuttaasut katersuutsillugit isumaannik tusarniaavigineqartassapput.
Tikeraaqattaarnerit naammassisimalerpata innuttaasut aaqqiissutissanik siunnersuuteqarnissamut akerliunerminnilluunniit ersersitsinissamut ullut 40-t missaannik periarfissinneqassapput.
Nunaviup namminerisaminik Naalakkersuisoqalernissaanut siunniunneqartut tamarmik iluatsissappata apriilip 27-ani aamma 28-ani inunnit taasissutigineqassaaq, Marianne Stenbæk, Montreal Canadamiit taama ilanngutassiivoq.
