Nunavimmi indianerit inuillu aatsitassanik piiaanermut politikkiliortut
Pilersaarummi pineqarluni Quebecip avannaani nuna Frankrigimit marloriaammik annertunerusoq, tamaanilu aatsitassarsiornikkut imermillu tunisassiornikkut ineriartortitsisoqarniarluni. Ineriartortitsinissamik pilersaarutip piaarnerpaamik akuerineqarnissaa naalakkersuisut kissaatigaat.
Taamaattorli indianerit Creet aamma naggueqatigiit Inuit pisuussutinik atuinermik ineriartortitsinissaq namminneerlutik isummersorfigaat.
Taamaattumik Makivimmit aatsitassarsiornermut politikertik tamanut saqqummiuppaat. Nunavimmi aningaasarsiornikkut inooqatigiinnikkullu ineriartorneq Makivimmit isumagineqarpoq.
Makiviup aatsitassarsiornermut politikkiani pingasunik anguniagaqartoqarpoq.
Taakkunani siulliulluni aatsitassarsiornerup Nunavimmiunut inooqatigiinnikkut aningaasarsiornikkut iluaqusiinissaa. Soorlu aatsitassarsiortitseqatigiit tamaani qalluiniartut, naggueqatigiinnik Inunnik sungiusaanissaminnik sulisoqarnissaminnillu suliniummik pilersitsissasut. Suliniutit tamakku aatsitassarsiortitseqatigiinnit akilerneqassapput naggueqatigiinnillu Inunnit akuerineqaqqaassallutik.
Anguniakkat aappaat tassaalluni aatsitassarsiornerit inooqatigiinnermut avatangiisinullu sunniutaat sapinngisamik minnerpaatinniarneqassasut. Tamatumani ilaatigut pineqarlutik naggueqatigiit Inuit kulturiat inooriaasiallu ataqqineqassasut. Tamatuma saniatigut aatsitassasiornerup sunniutai pitsaanngitsut minnerpaaffianiitiinnarnagit, aamma attaveqaatitigut pisariaqartinneqartut sanaartorneqartussat, soorlu piiaaffiup, aqqusernit, umiarsualiviit mittarfiillu sanaartorneqarnerisa sunniutaat minnerpaatinniarneqassapput.
Makiviup aatsitassarsiornermut politikkiani kingullertut anguniakkanili pingaaruteqarluinnartoq tassaavoq, naggueqatigiit Inuit, taakkualu kattuffiisa aatsitassarsiortitseqatigiillu akornnani ammasumik ataavartumillu oqaloqatigiittoqarsinnaanissaa. Taamaalilluni aatsitassarsiortitseqatigiit aatsitassarsiulinnginneranni taakku siunnersuutaasa aamma avatangiisinut inooqatigiinnikkullu sunniutissaasa misissoqqissaarnissaat, naggueqatigiinnit Inunnit piffissaqarluarluni akissaqarfigalugillu misissoqqissarneqarsinnaaniassammata.
